柏拉圖有一日問老師蘇格拉底究竟「什麼是愛情？」
蘇格拉底叫柏拉圖去麥田行一次，話只要摘到最大最好嘅麥穗就會得到答案。但係條件係只可以一直向前行不可回頭，而且摘嘅次數就只有一次。柏拉圖當時覺得好容易好快就走左入麥田嘗試。但係最後過左大半日柏拉圖卻空手而回，非常氣餒對老師話：「一路上其實都不斷遇到唔錯嘅麥穂，但係又唔知係咪最好嘅一棵，又因為只可以摘一次所以決定放棄繼續向前行，想再睇下後面會唔會有更好嘅... 直至走到盡頭嘅時候先發現原來手上一棵麥穗都無。」
蘇格拉底話：「呢樣就係愛情 - 愛情係一種理想，而且容易錯過。」
仲記得第一次踏入麥田嘅我係中四嘅時候。嗰陣時對愛情充滿憧憬，而且非常期待戀愛嘅感覺。當時我只係一個想擁有一棵麥穂嘅人，只要我有個人愛，或者有個人愛我就已經足夠。年輕時代嘅愛情就係心口掛住一個勇字"千軍萬馬都直衝"，嗰份勇氣嗰份愛永遠都係最純真最高昂。我曾經試過用200%嘅力去付出毫無保留，以為愛到爛額焦頭先至叫做真愛叫做無悔，甚至連尊嚴都唔理硬係要喺人哋屋企樓下等人死纏爛打。直到有一日我朋友同我講左句：You deserve better 之後，我先知道我其實可以搵個更加好嘅男人。
後來嗰份橫衝直撞嘅勇氣漸漸消失，變成凡事都會計過度過人地先至會做出決定。廿歲出頭以為自己年輕同仲有大把時間，我突然變得好似柏拉圖咁樣頭也不回一直向前衝，一心只想追求最大最好嘅麥穗，覺得唔啱嘅就立刻放棄。但係喺追求更好男人嘅過程當中，自己又忽略左"要找到對的人首先要讓自己先成為對的人，要提昇自己讓自己變得更好才會遇到好的另一半"。而隨著時間流逝，當初以年輕黎作為捍衞自己嘅武器，到醒覺嘅時候原來槍頭已經開始慢慢指向自己再無討價還價能力。
到左三十歲走到差唔多"盡頭"嘅時候，先發現原來手上一棵麥穗都無... Hahaha.... 無諗過原來繞咁大個圈最後都只係原地踏步。要放棄一段感情或者係一件好困難嘅事，但係雙方都肯願意繼續留低努力則需要更大嘅決心。現在嘅我除左不斷令自己成為更好嘅人之外，感情上只追求雙方舒服自在嘅關係，無論發生咩事都會堅持努力維繋感情共同進退。我已經唔再追求最大最好嘅麥穂，唔希望愛情只係理想亦唔想再錯過。假若今日你我有緣份走在一起，我就只想専注如何好好咁握住手心裏面嘅麥穗好好保護佢。什麼是愛情？每日人有唔同既defination，而我既就係 - 就算嗌左第三十一次交都好，雙方都有仍然想試多一次嘅決心，"是爭吵以後還是想要愛你的衝動"。共勉之。
#女人像鹽
Search